#2799

Խնդիրն այն է, որ հենց երեկ ավարտվեց «Նաիրիտի» նկատմամբ հետաքրքրություն ցուցաբերող ընկերություններից հայտերի ներկայացման հերթական վերջնաժամկետը: ՀՀ էներգետիկայի եւ բնական պաշարների նախարարությունից աշխատանքային օրվա վերջում հայտնեցին, թե մրցույթի վերջնաժամկետը ավարտվելու է կեսգիշերին: Իսկ մրցույթի մանրամասները հանրությանը կներկայացվեն հավանաբար այսօր: Նշենք, որ այդպես էլ չհաջողվեց պարզել, թե, ասենք, հունիսի 30-ի ժամը 18-ի դրությամբ որեւէ հայտ եղե՞լ է, եթե եղել է, ապա քանի՞ հատ: Անհասկանալի է, թե ինչու էր այդ տեղեկատվությունը պահվում յոթ կողպեքի տակ: Եթե գաղտնի պահվեր մրցույթին հայտեր ներկայացրած կոնկրետ ընկերությունների անուններ, ապա դա ինչ-որ տեղ հասկանալի կլիներ: Մի խոսքով, ամենագլխավոր հարցի պատասխանը, թե «Նաիրիտը» որեւէ մեկին հետաքրքրե՞լ է արդյոք, հնարավոր կլինի ստանալ լավագույն դեպքում այսօր:

Մեր տեղեկություններով, «Նաիրիտի» աշխատակիցների աշխատավարձերը վճարվում են ընդդիմության հանրահավաքներից առաջ միայն: Համաձայն «ավանդույթի», երեկվա հանրահավաքից առաջ եւս վճարվել էր գործարանի աշխատակիցների 1 ամսվա աշխատավարձը (գործարանը պարտք է 5 ամսվա աշխատավարձ): Դա տեղի է ունեցել, երբ պարապուրդի մեջ գտնվող գործարանի մի խումբ աշխատակիցներ գնացել են գործարան, հանդիպել ղեկավարությանը եւ հայտնել, որ եթե իրենց աշխատավարձերը 2 օրում չվճարեն, նախ երթով գնալու են նախագահական նստավայր եւ այնտեղ բողոքի ակցիա անեն, իսկ արդյունքի չհասնելու դեպքում ամբողջ աշխատակազմով երթով միանալու են հունիսի 30-ին Ազատության հրապարակում կայանալիք հանրահավաքին: Իհարկե, մեկ ամսվա աշխատավարձը, ինչպես «Նաիրիտի» աշխատակիցներն են պնդում, վերջին 5 ամսվա ընթացքում կուտակված կոմունալ վճարումների մի մասն էլ չի փակում, բայց այդ կերպ ղեկավարությունը փորձում է աշխատակիցներին հետ պահել կտրուկ գործողություններից: Երեկ «Նաիրիտի» մամուլի խոսնակ Անուշ Հարությունյանից այս կապակցությամբ մեկնաբանություն խնդրեցինք. նա ասաց, որ աշխատավարձերի վճարումը հանրահավաքների հետ որեւէ կապ չունի, եւ երբ որ հնարավորություն է լինում գումար հայթայթել, իրենք աշխատավարձը վճարում են:

Երեկ Սերժ Սարգսյանի մամուլի խոսնակ Արմեն Արզումանյանը մեր գրավոր հարցին, թե որտեղ է Սերժ Սարգսյանը նշելու իր տարեդարձը եւ ինչ կազմով, գրավոր պատասխանել էր. «Սերժ Սարգսյանը ծննդյան օրը, ինչպես միշտ, կանցկացնի տանը` ընտանիքի հետ»: Մեր աղբյուրները, սակայն, փոխանցում են, որ Սերժ Սարգսյանը երեկ երեկոյան Ծաղկաձորում էր, եւ դեռ առավոտից էլ իշխանական շրջանակներում լուրեր կային, որ նա իր տարեդարձը Ծաղկաձորում է նշելու:

Այսօր ՀՀ Ճարտարապետների միության մեծ դահլիճում տեղի է ունենալու հանրային քննարկում` Հանրապետության հրապարակի Կառավարության շենքի բակում գմբեթ կառուցելու նպատակահարմարության թեմայով: Հունիսի 17-ին Երեւանի քաղաքաշինական խորհրդում տեղի ունեցած քննարկման արդյունքում մեծամասնության ձայնով որոշում էր ընդունվել ՀՀ Կառավարական շենքի բակում կառուցել Ալ. Թամանյանի նախագծով նախատեսված թմբուկը: Թմբուկի կառուցմանը դեմ արտահայտվելու նպատակով ստեղծվեց «Պահպանենք Հանրապետության հրապարակը» անվանումով շարժում: Այսօր հրավիրված Հանրային քննարկումը թերեւս հասարակության բողոքների արդյունքն է:

Ըստ պաշտոնական վիճակագրության, այս տարվա առաջին հինգ ամիսներին Հայաստանի եւ Թուրքիայի միջեւ ապրանքաշրջանառության բացասական հաշվեկշիռը կազմել է 79 մլն 557 հազ. դոլար այն դեպքում, երբ անցած տարվա նույն ժամանակահատվածում այդ ցուցանիշը 68 մլն 170 հազ. դոլար է եղել:

Իսկ օդի ջերմաստիճանը, ըստ պաշտոնական տեղեկության, Երեւանում երեկ +38 աստիճան էր, ինչը, սակայն, չէր խանգարել, որ Ազատության հրապարակը բազմամարդ լինի: Ապացուցելու համար, որ Հայ ազգային կոնգրեսի քաղաքական ղեկավարության ելույթներից հանրահավաքի մասնակիցները շատ կարեւոր էներգիա ստացան, ոմանք հետեւյալ փաստարկն էին բերում. հրապարակում հնչած յուրաքանչյուր ելույթ, մանավանդ եթե այն վճռական գործողությունների գնալու թեմայով էր կամ այդպիսի հատված էր պարունակում, ամենաքիչը երեք անգամ ընդհատվում էր «հիմա-հիմա», «այո» եւ այլ վանկարկումներով ու ծափերով:

Սիրելի հայրենակիցներ,

Քանի որ արդեն մի քանի ամիս է, ինչ մենք բոլորս մասնակից ենք մի կոնկրետ քաղաքական գործընթացի, ես առանց նախաբանի կանգ կառնեմ երկու հարցի վրա, որոնցից առաջինը վերաբերում է մարտի 1-ի սպանությունների բացահայտման խնդրին, իսկ մյուսը՝ Հայ Ազգային Կոնգրեսի եւ իշխանության միջեւ երկխոսության հեռանկարին։ Բնականաբար, ես ծրագրել էի անդրադառնալ նաեւ Ռուսաստանի, Հայաստանի եւ Ադրբեջանի նախագահների կազանյան հանդիպմանը, բայց քանի որ, իմ տպավորությամբ, նրա մանրամասները գաղտնի են պահվում, ապա առայժմ զերծ կմնամ որեւէ մեկնաբանությունից։ Բավարարվեմ միայն հիշեցնելով, որ Կոնգրեսի դիրքորոշումը Ղարաբաղյան կարգավորման ցանկացած ծրագրի վերաբերյալ, կախված է բացառապես նրանից, թե որքանով է այն ընդունելի Ղարաբաղի ժողովրդի ու իշխանության համար։ Իսկ այժմ անցնեմ ելույթիս բուն նյութին։

Իր ելույթի գրավոր տեքստից Լեւոն Տեր-Պետրոսյանը երեկ որոշ «շեղումներ» է թույլ տվել:

Ասելով, որ մարտի 1-ի 10 սպանությունների բացահայտման բանալին այդ օրը տրված հրամանների համակարգի վերհանումն է, Տեր-Պետրոսյանը մանրամասնել է. «Ավելի պարզ բացատրեմ. եթե հարցաքննվում է անգամ վերջին, ստորին ոստիկանը, որը կամ հատուկ միջոց կամ հրազեն է օգտագործել, նա այդ հարցաքննության ժամանակ անմիջապես ասում է` ումից է ստացել հրամանը: Ոչ ոք իր վրա չի վերցնելու: Անմիջապես ասելու են, թե ով է իրենց հրամայել կրակել: Հետո` հարցաքննում ես հրամայողին, նա էլ տալիս է իրեն հրաման տվողի անունը, եւ այսպես հասնում ենք մինչեւ Սերժ Սարգսյան եւ Ռոբերտ Քոչարյան»:

Եթե «ՎիվաՍել-ՄՏՍ» բջջային օ-պերատորի հայաստանցի բաժանորդը կարող է, օրինակ, ամսական 10 հազար դրամ վճարելով` 5 հազար րոպե ցանցի ներսում խոսելու հնարավորություն ստանալ, այսինքն` խոսել` 1 րոպեն 2 դրամով, ապա  «Ղարաբաղ Տելեկոմի» բաժանորդները 5 հազար րոպե խոսելու դիմաց ստիպված կլինեն վճարել 165 հազար դրամ: Ինչպես տեղեկացանք ԼՂՀ-ում գործող միակ օպերատորի պաշտոնական կայքից, ցանցի ներսում զանգի մեկ րոպեն այստեղ արժե 33 դրամ (հետվճարային սակագնային պլանով): Կամ օրինակ, եթե Հայաստանում 8 հազար 800 դրամ վճարելով` կարելի է մեկ ամիս անսահմանափակ ինտերնետ ունենալ, ապա Արցախում դա միայն մեծահարուստներին հասանելի բարիք է: Այստեղ ինտերնետի համար ամսական պետք է վճարել շուրջ 35 հազար դրամ:

Հունիսի 29-ին սննդային թունավորում ախտորոշմամբ Գորիսի հիվանդանոց են տեղափոխվել 17 հոգի, որոնցից 15-ը հոսպիտալացվել են: Երեկ մեզ հայտնի դարձավ որ թունավորվածները Արտաշատի թիվ 2 դպրոցի ուսուցչական կոլեկտիվը` ընտանիքների հետ միասին հունիսի 28-ին ավտոբուսով մեկնել էին Տաթեւ: Այնտեղ որոշ ժամանակ մնալուց եւ բաց երկնքի տակ սնվելուց հետո գնացել էին Գորիս` «Եղեւնուտ» հյուրանոցում գիշերելու: Հաջորդ օրը առավոտյան նրանք ոչ միայն օգտվել են հյուրանոցի նախաճաշից, այլեւ կերել են իրենց մոտ եղած ուտելիքները: Թունավորվածները ասել են, որ բոլորն էլ կերել են ղավուրմա, եւ ենթադրվում է, որ հենց դա է եղել թունավորման պատճառը: Նշանակվել են փորձաքննություններ: Առողջապահության նախարարության փոխանցմամբ, հիվանդներից երկուսը երեխաներ են` 7 եւ 8 տարեկան: Բոլոր 15 անձանց առողջական վիճակը կայուն է, սակայն երեկվա դրությամբ նրանք դեռեւս հիվանդանոցում էին: Հիվանդանոցից դուրսգրումներ սպասվում են այսօր: Ոստիկանության հասարակայնության հետ կապի եւ լրատվության վարչությունից մեզ հայտնեցին, որ դեպքի հանգամանքները պարզվում են, այժմ քննություն է ընթանում:

«Եթե Մարադոնան իրեն համարում է 20-րդ դարի լավագույն ֆուտբոլիստ, դա իր պրոբլեմն է»,- այս խոսքերի հեղինակն է ֆուտբոլի «Արքա» Պելեն: Անցյալ դարի ավարտին ՖԻՖԱ-ն փորձեց որոշել 20-րդ դարի լավագույն ֆուտբոլիստին: Տարատեսակ հարցումներում լավագույնի կոչումը նվաճում էր արգենտինացի Դիեգո Մարադոնան: Բայց նա լուրջ խնդիրներ ուներ ՖԻՖԱ-ի ղեկավարների հետ, որոնք ուղղակի չէին կարող համակերպվել լավագույնի կոչումը Մարադոնային շնորհելու մտքի հետ: ՖԻՖԱ-ն ի վերջո հայտարարեց, թե 20-րդ դարի լավագույն ֆուտբոլիստները 2-ն են` արգենտինացի Մարադոնան ու բրազիլացի Պելեն: «Արքան» բարկացել էր թագը մեկ այլ ֆուտբոլիստի հետ կիսելու պատճառով...

Ավստրիայում ուսումնամարզական հավաք անցկացնող Դոնեցկի «Շախտյորի» հաղթանակով է ավարտվել Salzburger Land Cup-2011 անունը կրող միջազգային ընկերական մրցաշարը, որին մասնակցում էին նաեւ Վիենայի «Աուստրիան», Բուխարեստի «Ռապիդն» ու Հայֆայի «Մաքքաբին»: «Շախտյորի» ֆուտբոլիստները 3-1 հաշվով հաղթանակ են տոնել «Աուստրիայի» նկատմամբ, իսկ եզրափակիչում 2-0 հաշվով առավելության հասել «Մաքքաբիի» հետ խաղում: 2 հանդիպումներում էլ հաշիվը բացել է Հայաստանի ազգային հավաքականի ֆուտբոլիստ Հենրիխ Մխիթարյանը, որը ճանաչվել է նաեւ եզրափակիչ հանդիպման լավագույն խաղացող:

Հայաստանի անցյալ տարվա փոխչեմպիոն «Բանանցն» ու բրոնզե մեդալակիր «Ուլիսը» պարտություններով մեկնարկեցին Եվրոպայի լիգայի խաղարկության նոր մրցաշրջանում: «Բանանցը» սեփական մարզադաշտում 0-1 հաշվով պարտվեց վրացական «Մետալուրգից» (Ռուսթավի), իսկ «Ուլիսը» հյուրընկալվելիս 0-3 հաշվով պարտվեց հունգարական «Ֆերենցվարոշից»: Պատասխան հանդիպումները կայանալու են հուլիսի 7-ին:

ԵԱՀԿ գլխավոր նոր քարտուղար է երեկ ընտրվել Իտալիայի ներկայացուցիչ Լամբերտո Զանիերը: Մինչ ընտրվելը նա զբաղեցրել է Կոսովոյում ՄԱԿ-ի հատուկ ներկայացուցչի պաշտոնը: Այս պաշտոնում Զանիերին փոխարինում է ֆրանսիացի Մարկ Պերեն դե Բրիշամբոյին:
Բացի Զանիերից` գլխավոր քարտուղարի պաշտոնին իրենց թեկնածուներին էին ներկայացրել Ավստրիան` ի դեմս նախկին ԱԳ նախարար Ուրսուլա Պլասնիկի, Թուրքիան` ի դեմս Էրսին Էրչինի, որը երկրի նախագահի` Եվրոպայի անվտանգության հարցերով խորհրդականն է եւ Պորտուգալիան` ի դեմս ԵԱՀԿ Խորհրդարանական վեհաժողովի նախկին նախագահ Ժոաո Սոկրատեշի: Որոշ տեղեկությունների համաձայն, Հայաստանն ու Կիպրոսի Հանրապետությունը վետո են դրել Էրչինի թեկնածության վրա, իսկ Թուրքիան էլ, իր հերթին` Պլասնիկի թեկնածության վրա: