#2589

Որեւէ նորմալ երկրում այս հարցի պատասխանը գտնելու համար տնտեսագետները կվերլուծեին ասենք միջազգային տնտեսական զարգացման կոնյունկտուրան, վերաֆինանսավորման տոկոսադրույքի փոփոխության ազդեցությունը, ԱՄՆ պետական ռեզերվների հրապարակած տվյալները...: Հայաստանում ամեն ինչ ավելի պարզ է ու հասկանալի եւ այդ հարցի պատասխանը գտնելու համար ամենեւին էլ պարտադիր չէ թույն տնտեսագետ լինել: Պետք է ընդամենը հետեւել գների փոփոխություններին, իմանալ, թե ինչպես են Հայաստանում ծնվում վիճակագրական տվյալները եւ խնդրեմ, պատասխանը գտնված է: Եւ ուրեմն այսպես: Բենզինը նախորդ օրը էժանացավ, իսկ հացը թանկացել էր հուլիսի վերջին-օգոստոսի սկզբին: Առաջին հայացքից սա ոչինչ չի նշանակում: Բայց միայն առաջին հայացքից: Դրանում համոզվելու համար նայենք, թե նախկինում, ասենք վերջին մեկ տարվա ընթացքում, ամսվա ո՞ր ժամանակահատվածում են սովորաբար բարձրացել բենզինի գները: 2009-ի հունիսի 4-ին բենզինը թանկացավ 20 դրամով, եւս մի թանկացում տեղի ունեցավ 2009-ի նոյեմբերի 5-ին, հաջորդ թանկացումը տեղի ունեցավ 2010 թվականի մարտի 3-ին, մյուսը մարտի 9-ին, հաջորդը 2010-ի ապրիլի 7-ին...:

Գյումրիի հայտնի «Պատվո բլուր» հուշարձանը ՌԴ նախագահ Դմիտրի Մեդվեդեւի այցի առիթով վերջերս վերանորոգած բանվորները, պարզվում է, մինչեւ հիմա դեռ չեն ստացել իրենց աշխատավարձի մի մասը: Հուշարձանի վրա աշխատած շինարարները իրենց բողոքն արտահայտելու համար երեկ գնացել են Գյումրիի քաղաքապետարան: Այնտեղ նրանց խորհուրդ են տվել եւս մեկ շաբաթ սպասել, քանի որ շինարարության ղեկավարները մեկնել են հանգստանալու: Բողոքի ակցիայի մասնակիցներից մեկը երեկ լրագրողներին ասել է, որ շինարարության ղեկավարների հետ իրենք հույս չեն կապում, քանի որ արդեն մի քանի ամիս նրանք իրենց ասում են` էսօր կտանք, էգուց կտանք: Հարցին, թե ովքե՞ր են շինարարության ղեկավարները, աշխատակիցներից մեկն ասել է, թե իրենք ոչ մեկին չգիտեն, միայն գիտեն իրենց պրարաբին, որի անունը Արթուր է: Մեզ երեկ չհաջողվեց պարզել, թե ով է պատասխանատու շինարարների աշխատավարձերի վճարման համար, քանի որ Գյումրիի քաղաքապետարանից մեզ ասացին, որ այդ հարցով քաղաքապետարան դիմենք այսօր:

2010 թվականի հուլիսի 1-ի դրությամբ Հայաստանի բնակչությունը կազմել է 3 միլիոն 254 հազար 600 մարդ: Այսպիսի տվյալներ է երեկ հրապարակել Հայաստանի Ազգային վիճակագրական ծառայությունը: Ըստ այդմ, Հայաստանի բնակչությունը 2009 թվականի նույն ժամանակահատվածի համեմատ, աճել է 13 900-ով:

Մինեապոլիսի ցորենի բորսա - 1 բուշելը 6.8 ԱՄՆ դոլար (-0.29) առավելագույն գինը 2010թ. 1 բուշելը 7.83 ԱՄՆ դոլար (5.08.2010թ.)
Կանադայի էքսպորտային նավահանգիստ - 1 տոննան` 311.25 դոլար (-8.15)
առավելագույն գինը 2010թ. 1 տոննան 351.4 ԱՄՆ դոլար (5.08.2010թ.)
ծանոթություն. մեկ բուշելը 27.2 կիլոգրամ է: Փակագծում նշված է գնի փոփոխությունը նախորդ օրվա համեմատ:

Եթե ադրբեջանցիներին հաջողվի հասնել այն բանին, որ իրենց ներկայացրած նախագիծն ընդունվի, ինչի հավանականությունը խիստ մեծ է, ապա, ինչպես փոխանցում են «ՀԺ»-ի դիվանագիտական աղբյուրները, այն կարող է մտնել նաեւ ՄԱԿ-ի անվտանգության խորհուրդ եւ պարտադիր կատարման ուժ ստանալ: Իսկ ՄԱԿ-ի ԱԽ, ըստ ՄԱԿ-ի ընթացակարգերի, անդամ ցանկացած պետություն կարող է դիմել` ցանկացած հարց ընդգրկելու համար: ԱԽ-ն որոշում է` հարցն ընդգրկել օրակարգում, թե` ոչ. եթե ընդգրկում է, ապա համապատասխան փաստաթութղը դրվում է քվեարկության: Այստեղ փաստաթղթերն ընդունվում են քվեարկողների ձայների պարզ մեծամասնությամբ: Սեպտեմբերի 9-ի նիստին Աբրբեջանը, ինչպես երեւում է, շատ լուրջ է նախապատրաստվել: ՄԱԿ-ում Ադրբեջանի դեսպանի պաշտոնակատար Թոֆիկ Մուսաեւը ս/թ օգոստոսի 10-ին ՄԱԿ-ի գլխավոր քարտուղարին նամակ է ուղարկել (այն տեղադրված է ՄԱԿ-ի կայքում), որտեղ փորձում է ապացուցել, թե Ղարաբաղում գտնվում են Հայաստանի զորքերը: Մուսաեւն իր ասածի համար հիմք է վերցրել հայկական զինված ուժերում տեղի ունեցած վերջին դեպքերը` Չայլուի եւ Մարտունու:

Օգոստոսի 19-ին նախագահական նստավայրում Ռուսաստանի դաշնության նախագահ Դմիտրի Մեդվեդեւի պատվին հրավիրված պետական ճաշին, ինչպես հայտնի է, հրավեր էին ստացել խորհրդարանի բոլոր խմբակցությունների ղեկավարները: ԲՀԿ առաջնորդ, ԱԺ ԲՀԿ խմբակցության ղեկավար Գագիկ Ծառուկյանը, սակայն, այդ ճաշին չի մասնակցել: Այս մասին երեկ «ՀԺ» թղթակցին հայտնել է Ծառուկյանի մամուլի խոսնակ Խաչիկ Գալստյանը: Նա հայտնել է նաեւ, որ ԲՀԿ-ից ընդհանրապես որեւէ մեկը ճաշին չի մասնակցել: Թե ինչո՞ւ, Գալստյանն ասաց, «Չեմ կարող ասել»: Երեկ մենք փորձել ենք նաեւ նախագահական նստավայրից ճշտել, թե որն է պատճառը, որ Ծառուկյանը պետական ճաշին չի մասնակցել: Մեզ պատասխանեցին, թե այդ կապակցությամբ ոչինչ ասել չեն կարող, հարցին պետք է պատասխանի Ծառուկյանը: Նշենք, որ այդ օրերին Ծառուկյանը հանրապետությունում էր եւ դժվար թե այդ օրը եւ այդ ժամին այնպիսի անհետաձգելի գործ ունեցած լիներ, որ դրա պատճառով հրաժարվեր նման ճաշի մասնակցելու հնարավորությունից: Սա թերեւս Սերժ Սարգսյան-Գագիկ Ծառուկյան հակասության վառ դրսեւորումներից մեկն է: Եթե նախկինում Ծառուկյանը Սերժ Սարգսյանի մասնակցությամբ խոշոր միջոցառոււմների ժամանակ «անհետանում» էր ՀՀ-ից, հիմա, փաստորեն, տակտիկան փոխել է:

Հուլիսի 28-ի դեպքերի հետեւանքով զոհված ժամկետային զինծառայող Անդրանիկ Սարգսյանի հորը` Սարգիս Սարգսյանին օրերս հայտնի է դարձել այն մարդու անունը, որը դեպքի ժամանակ գտնվել է դիրքային հենակետում: Ավելին, հենց նա է եղել միջադեպի հեղինակը:

Սարգսյանի խոսքով այդ մարդը` գումարտակի հրամանատարի տեղակալ, փոխգնդապետ Հովհաննես Դանիելյանն է, որը դեպքերից հետո ընդամենը ազատվել է աշխատանքից: Ըստ Սարգսյանի, մինչ այժմ Դանիելյանի մասնակցությունը միջադեպին թաքցվել է, որովհետեւ «բոլորին ձեռք է տվել, որպեսզի հայտարարվի, թե միջադեպի բոլոր ականատեսները մահացել են, քանի որ մահացածներին չեն դատում»:

Այսօր եւ վաղը հանրապետության շրջանների զգալի մասում սպասվում է անձրեւ եւ ամպրոպ, ամպրոպի ժամանակ` քամու ուժգնացում մինչեւ 20-23 մ/վ արագության: ՀՀ ԱԻՆ «Հայպետհիդրոմետ»-ի օդերեւութաբանական կանխատեսումների բաժնի պետ Գագիկ Սուրենյանը ասաց, որ տեղումները կգրանցվեն երեկոյան եւ գիշերը եւ պայմանավորված կլինեն Սեւ ծովից տեղափոխված ցիկլոնի ազդեցությամբ: Սուրենյանի խոսքով, այսօր եւ վաղը օդի ջերմաստիճանը հանրապետությունում կնվազի 2-ից 4 աստիճանով եւ առավելագույն ջերմաստիճանը չի գերազանցի + 31 աստիճանը: Իսկ արդեն օգոստոսի 28-ից օդի ջերմաստիճանը կբարձրանա 2- 4 աստիճանով, կնկատվի առանց տեղումների եղանակ, ջերմաստիճանը կտատանվի 33-34 աստիճան տաքության սահմաններում:

ԼՂՀ պաշտպանության բանակի մամուլի ծառայության տարածած հաղորդագրության համաձայն, օգոստոսի 23-ի լույս 24-ի գիշերը եւ օրվա ընթացքում ղարաբաղա-ադրբեջանական զորքերի շփման գոտու մի շարք հատվածներում արձանագրվել է հրադադարի ռեժիմի խախտման շուրջ 15 դեպք: Ադրբեջանի ԶՈՒ առաջապահ ստորաբաժանումները տարբեր տրամաչափի հրաձգային զենքերից եւ դիպուկահար հրացաններից գնդակոծել են Հադրութի, Ասկերանի եւ Մարտակերտի շրջանների պաշտպանական ուղղություններում տեղակայված ղարաբաղյան դիրքապահների հենակետերը: Պաշտպանության բանակի առաջապահ ստորաբաժանումների ձեռնարկած պատասխան գործողություններից հետո հակառակորդը լռել է:

«Արփա-Սեւան» բաց բաժնետիրական ընկերությունը հաղթող է ճանաչվել «Աբու-Դաբիի զարգացման հիմնադրամի» աջակցությամբ իրականացվող «Արփա-Սեւան» թունելի վերականգնման համար հայտարարված մրցույթում: ՀՀ կառավարության մամուլի ծառայության փոխանցմամբ, մրցույթի արդյունքները վերջնականապես կհաստատվեն կառավարության օգոստոսի 26-ի նիստում: Արփա-Սեւան» ընկերությունը պարտավորվել է իրականցնել 11,8 մլրդ դրամի (մոտ 30 մլն դոլար) շինարարական աշխատանք: Սա մոտ 1 մլրդ դրամով (մոտ 2,7 մլն դոլար) պակաս է նախնական նախահաշվից: Մրցույթին հայտ են ներկայացրել 3 կազմակերպություններ, սակայն «Արփա-Սեւանի» առաջարկը գնային տեսանկյունից եղել է ամենանախընտրելին:

Առաջին խումբը նրանք են, ովքեր, առանց երկար ու բարակ մտածելու եւ առանց հակափաստարկման համակարգի մեջ խորանալու, քննադատությունը կոչեցին «հակառուսական ոռնոց», իսկ քննադատողներին՝ «հոգեկան հիվանդ»: Բնականաբար, սա լուրջ արժեք ունեցող արձագանք չի կարելի կոչել: Կարելի է միայն զարմանալ, որ նույնիսկ Ադրբեջանին հզոր պաշտպանական զենք տրամադրելու փաստը որոշ մարդկանց համար բավական չէ, որպեսզի նրանք ավելի զուսպ եւ զգույշ լինեն իրենց անմնացորդ նվիրվածության եւ բուռն կրքերի արտահայտման մեջ Ռուսական Կայսրության նկատմամբ: Հետաքրքիր է, որ մեզանում հաճախ նույնիսկ հայաստանյան իշխանության քննադատությունը այդքան բուռն հակազդեցություն չի առաջացնում, որքան ռուսական քաղաքականության եւ ազդեցության քննադատությունը: Սա, ի դեպ, կարելի է համարել նշան այն բանի, թե որտե՛ղ է իրականում գտնվում Հայաստանի բարձրագույն իշխանությունը կամ գոնե ո՛ւմ են ոմանք ընկալում որպես իրական իշխանություն:

Այս տվյալները հրապարակելով` վերը նշված դեպարտամենտը ընդգծել է նաեւ, որ Հայաստանից ժամանող հանգստացողների հիմնական հոսքը լինում է օգոստոս ամսին: Չնայած դեռ մի քանի օր էլ կա օգոստոսի ավարտին եւ այս ամսվա տվյալների ամփոփմանը, սակայն հենց այդ ամսի երկրորդ տասնօրյակը Աջարիայում գտնվելու ընթացքում մեր դիտարկումների հիման վրա նախապես կարող ենք ասել. այդ ցուցանիշը եւս նախորդ տարվա համեմատ շատ բարձր է լինելու:

Քոբուլեթի ժամանող հայաստանցի հանգստացողների առաջին տպավորությունն այն է, որ նրանց թվում է, թե հայկական քաղաքում են հայտնվել. ամեն կողմից հայերենն է լսվում, պարզապես օտարերկրացիները, իսկ ավելի ճիշտ` վրացիները մի տեսակ սովորականից շատ են: Այս զգացողությունը կոտրում են շրջակա միջավայրի վրացերեն ցուցանակները եւ գրառումները:

Հայտնի հայ դուդուկահար Ջիվան Գասպարյանի եւ թուրք երգիչ Յավուզ Բինգյոլի Թուրքիայում նախատեսված համատեղ համերգը թուրքական իշխանությունները չեղյալ են հայտարարել: Այդ լուրը տարածվել է թուրքական լրատվամիջոցներում: Նախորդ տարի որոշում էր կայացվել ամեն տարի սեպտեմբերի 1-ին` Խաղաղության միջազգային օրը Թուրքիայում համերգ անցկացնել: Երեկ մեզ հետ զրուցում Ջիվան Գասպարյանն ասաց, որ անցյալ տարի իրեն հրավիրել էին, եւ համերգը բարեհաջող տեղի էր ունեցել, այդ պատճառով էլ այս տարի ընդունել էր հրավերը: «Ես չգիտեմ ինչ պատճառով է չեղյալ հայտարարվել: Ես այդ մասին իմացա թուրքական թերթերից մեկին Բինգյոլի տված հարցազրույցից, որի ժամանակ Բինգյոլն իր զարմանքն է արտահայտել համերգի չեղյալ հայտարարվելու կապակցությամբ` նշելով, թե այդպիսի հզոր երաժիշտ է գալիս, իսկ իրենց իշխանությունները արգելում են: Բինգյոլն ասել է, թե իրեն նույնպես չի բացատրվել համերգը չեղյալ հայտարարելու պատճառը»,- ասաց Գասպարյանը:

Բազմաթիվ մասնագետներ, մեկնաբաններ, պաշտոնյաներ, այդ թվում` միջազգային օլիմպիական կոմիտեի նախագահ Ժան Ռոգեն, անչափ բարձր են գնահատել այս խաղերի նշանակությունը, նշելով, որ Սինգապուրում աչքի ընկած պատանիներից շատերը դառնալու են 2012 թվականին Լոնդոնում կայանալիք ամառային Օլիմպիական խաղերի գլխավոր դերակատարներ, հերոսներ: Մարզական աշխարհը նույնպես կարեւորում է այս միջոցառումը. Սինգապուր ժամանեցին ու պատանի մարզիկների հետ հանդիպումներ անցկացրին համաշխարհային սպորտի հեղինակություններ, օլիմպիական չեմպիոններ, արագավազորդ Ուսեյին Բոլտը, բարձրացատկորդ Ելենա Իսիմբաեւան, լողորդ Մայքլ Ֆելպսը եւ այլք: 2 շաբաթ տեւած այս խաղերին մասնակցեցին 205 երկրների շուրջ 3500 մարզիկներ, ովքեր մրցեցին 26 մարզաձեւերում ու խաղարկեցին մեդալների 201 հավաքածու:

Ադրբեջանը շարունակում է աղմուկ բարձրացնել ՀՀ-ում ռուսաստանյան ռազմակայանի տեղակայման ժամկետների երկարաձգման ու դրա գործառույթների ընդլայնման մասին օգոստոսի 20-ին ստորագրված փաստաթղթի շուրջ: Ադրբեջանի նախագահի աշխատակազմի հասարակական-քաղաքական հարցերով վարչության պետ Ալի Հասանովը երեկ հայտարարել է, թե հայ-ռուսական համաձայնագրի ստորագրումից հետո Ադրբեջանն ու ԵԱՀԿ-ն փորձում են պարզել, թե արդյոք Հարավային Կովկասում չի խախտվել սպառազինությունների սահմանված քվոտան: Նա հիշեցրել է, որ 1992-ին ՀՀ-ն, Ադրբեջանն ու Ռուսաստանը միացել են Եվրոպայում սովորական սպառազինությունների մասին շրջանակային պայմանագրին, որով սպառազինությունների որոշակի քվոտա է սահմանվում յուրաքանչյուր երկրի համար: Դրա հիման վրա Հասանովը պնդում է, որ Գյումրիի 102-րդ ռուսաստանյան ռազմականի զինտեխնիկան ու սպառազինությունը պետք է ներառվեն ՀՀ-ի համար սահմանված քվոտայի մեջ, որպեսզի այն չգերազանցվի:

Միաժամանակ նա նշել է, որ Ադրբեջանը մտադիր չէ անդամակցել ոչ ՆԱՏՕ-ին, եւ ոչ էլ ՀԱՊԿ-ին, քանի դեռ վերջիններս չեն դատապարտել ՀՀ «օկուպացիոն» քաղաքականությունը: Նա նաեւ հավելել է, թե ռուսական կողմն քանիցս ասել է, որ Ադրբեջանի համար բաց են ՀԱՊԿ-ի դռները, բայց Ադրբեջանը հրաժարվել է «ագրեսոր երկրի»` Հայաստանի հետ նույն կազմակերպությանն անդամակցելուց: Իր հերթին, արձագանքելով հայ-ռուսական համաձայնագրի ստորագրմանը, Ադրբեջանի ՊՆ մամլո խոսնակ Էլդար Սաբիրօղլուն հայտարարել է, թե դա արդեն իսկ ծանրակշիռ հիմք է` պնդելու, որ Հայաստանը անկախություն չունեցող երկիր է:

Օլիմպիական խաղերի եռակի չեմպիոն, արագավազորդ Ուսեյին Բոլտը երկարաձգել է իր համագործակցությունը մարզական հանդերձանք արտադրող Puma ֆիրմայի հետ: Բոլտի եւ Puma-ի միջեւ կնքված նոր պայմանագրի համաձայն` ճամայկացի ատլետը կստանա այնքան գումար, ինչը չի ստացել եւ ոչ մի մարզիկ սպորտի պատմության մեջ` այսպես պնդում են ֆիրմայի ղեկավարները: Բոլտին տրվող գումարի չափը առայժմ չի հրապարակվում, սակայն նշենք, որ մինչ այժմ աշխարհում ամենաբարձր վարձատրվող ատլետը ռուս բարձրացատկորդուհի, Օլիմպիական խաղերի կրկնակի չեմպիոն Ելենա Իսիմբաեւան էր, որը 2008-ին 7,5 միլիոն ԱՄՆ դոլար գումարի պայմանագիր էր կնքել չինական կազմակերպություններից մեկի հետ: