Ինքնասպան եղեք դուք
«Մենք` դատապարտյալներս, սրտի խոր կսկիծով ընդունեցինք ԼՂՀ Մարտունու զորամասում տեղի ունեցած միջադեպը, որը ողբերգական վախճան ունեցավ` խլելով վեց երիտասարդի կյանք` թողնելով նրանց երազանքները անկատար: Հայը նորից խաղաղ պայմաններում գնդակահարվեց, նորից ողբացին մեր քույրերն ու կանայք, նորից մայրերը մեր սեւ հագան, ու կրկին առաջ քաշվեց «ինքնասպանության» վարկածը` փորձելով «թոզ» փչել հանրության դեմքին:
Այս ի՞նչ է տիրում Հայոց բանակում: Մեկը մյուսի ետեւից սպանում են եւ այն որակում «ինքնասպանություն»: Դա շատ հեշտ է, ոչ մեղադրյալ կա, ոչ էլ վկա: Իսկ իրականում, կոնկրետ հենց այս եղեռնագործության պարագլուխները դեռ կենդանի են, եւ հիմա այդ վիժվածքներն ուրախանում են, որ սպանելով իրենց եղբայրներին` այս անգամ էլ են մնալու անպատիժ, քանզի հայերենն ունի չտեսնված բառ, որը կոչվում է «ինքնասպանություն», այն լվանում է բոլոր հետքերը եւ հօդս ցնդեցնում բոլոր վարկածները:
Հետաքրքիր է, այդ ինչպես իմացան, ես չեմ կարող պատկերացնել, որ Կարո Այվազյանն է բոլորին սպանել, հետո ինքն իրեն սպանել: Լրագրերում այդ թեման չի շոշափվում: Հնարավոր է` ուրիշ մեկն է սպանել բոլորին եւ ինքնասպան եղել: Այստեղ չկա ինքնասպանություն, այստեղ պարզից էլ պարզ է, որ սա պատվիրված բանակային սպանություն էր: Եւ եթե ՀՀ ՊՆ տեղեկատվության եւ հասարակայնության հետ կապերի վարչությունը չկոծկի այս միջադպը, ինչպես պետի տեղակալ Ֆելիքս Պողոսյանն է ասում, եթե ծածկադմփոց չանեն եւ մանրակրկիտ քննություն անցկացնեն, ապա իսկությունը կբացահայտվի:
Բավական է, ինչքա՞ն կարելի է խեղաթյուրել իրականությունը, սպանությունները որակելով ինքնասպանության, ինչպես սպա Արտակ Նազարյանի խորհրդավոր սպանությունը, որը նույնպես փորձում են վարագուրել ինքնասպանության ֆոնի ներքո:
Ժամանակն է, որպեսզի ինքնասպանություն գործեն Սեյրան Օհանյանն ու Ալիկ Սարգսյանը, որոնց, անկեղծ ասած, կսազի այդ վիճակը»:
Խմբագրությունը պատասխանատվություն չի կրում քաղաքացիների նամակներում տեղ գտած փաստերի ճշգրտության համար: Մենք պատրաստ ենք տպագրել նյութում բերված փաստերի հետ անհամաձայնություն ունեցող ֆիզիկական եւ իրավաբանական անձանց տեսակետները:
Կարծիքներ
Հայտնեք ձեր կարծիքը