Նամակ Քլինթոնին

ԱՄՆ պետքարտուղար Հիլարի Քլինթոնի հայաստանյան այցի ընթացքում պաշտոնական հաղորդագրությունների եւ հայտարարությունների մեջ որեւէ բառ չնշվեց` արդյոք քաղբանտարկյալների հարցը ՀՀ իշխանությունների հետ հանդիպումների ժամանակ արծարծվե՞լ է, թե` ոչ: Այս մասին տեղեկատվություն երեկ մեզ չհաջողվեց ստանալ նաեւ Հայաստանում Միացյալ Նահանգների դեսպանությունից: Այնինչ, ԱՄՆ պետքարտուղարությունը «Հայաստանում մարդու իրավունքները» 2009 թվականի 84 էջանոց իր զեկույցում մանրակրկիտ անդրադարձել էր քաղբանտարկյալների խնդրին: «Տարվա ընթացքում իշխանությունները քաղաքացիների նկատմամբ, հատկապես նրանց, ում կառավարությունը համարել է քաղաքական ընդդիմադիր, կիրառել են կամայական ձերբակալություններ, կալանավորումներ ու ազատազրկում իրենց քաղաքական գործունեության համար. երկարատեւ նախնական կալանքը մնացել է խնդրահարույց: Իշխանությունները շարունակել են կիրառել հալածանքներ եւ դիմել են միջամտության բյուրոկրատական միջոցների` քաղաքական ընդդիմադիրներին ահաբեկելու եւ հաշվեհարդար տեսնելու համար: Ազգային անվտանգության ծառայությունը եւ ոստիկանությունը մարդու իրավունքների ոտնահարման ենթադրյալ դեպքերում գործել են անպատիժ», «Իշխանությունները շարունակել են կամայականորեն կալանավորել անհատների` ընդդիմադիր քաղաքական կապերի կամ քաղաքական գործունեության համար». սրանք հատվածներ են պետքարտուղարության 2009 թվականի զեկույցից: Երեկ մեզ հայտնի դարձավ միայն, որ քաղբանտարկյալների հարցը ԱՄՆ պետքարտուղարի հետ հանդիպման ժամանակ բարձրացրել են հասարակական կազմակերպությունների ներկայացուցիչները: Բացի այդ, նրանք 5 կետից բաղկացած նամակ են հանձնել Քլինթոնին, որտեղ պահանջվում է նաեւ` անհապաղ ազատ արձակել քաղբանտարկյալներին: