Գորան Լինդբլադ. «Այդ մարդիկ քաղբանտարկյալներ են»
- Պ-ն Լինդբլադ, Հայաստանի հարցով նախկին համազեկուցողները շուրջ մեկ տարի է` Հայաստանում չեն եղել: Ավելին, ԵԽԽՎ Մոնիտորինգի հանձնաժողովի երկու նիստերին, երբ պետք է քննարկվեր նաեւ Հայաստանի հարցը, նրանք ներկա չգտնվեցին: Դուք ինչպե՞ս եք սրան վերաբերվում:
- Ես չեմ մեկնաբանի այն, թե ինչ են արել կամ չեն արել իմ նախորդները: Իմ նպատակն է` որքան հնարավոր է շուտ այցելել Հայաստան: Այսուհանդերձ, այդ այցը պետք է համակարգվի մյուս համազեկուցողի եւ հայկական կողմի հետ: Կարծես թե այժմ Հայաստանի խորհրդարանն արձակուրդում է:
- Հայաստանում գնալով ավելի լայն շրջանակներ են քննարկում այն թեման, որ համազեկուցողները համագործակցում են ՀՀ իշխանությունների հետ: Ձեր կարծիքով, որքանո՞վ է այս երեւույթը համահունչ Եվրոպայի քարոզած ժողովրդավարական արժեքներին:
- Որպես համազեկուցող, կարեւոր է անկողմնակալ լինել: Կարծում եմ, որ ԵԽԽՎ բոլոր զեկուցողները նման ձգտում ունեն: Մեր գործն անդամ երկրին օգնելն է` հասնել իր պարտավորությունների կատարմանը, եւ եթե սա տեղի չի ունենում, ապա մենք այն պարտավոր ենք ներառել մեր զեկույցում:
- Չե՞ք կարծում, որ ղարաբաղյան հարցով իրադարձությունների սրընթաց զարգացումը եւ Հայաստանում ժողովրդավարական վիճակի վերաբերյալ Եվրոպայում տիրող վերջին շրջանի լռությունը պարզ զուգադիպություն չէ, այլ կապված է ԼՂ հարցում պահանջվող զիջումների հետ:
- Լեռնային Ղարաբաղի խնդրի շուրջ բանակցությունները ղեկավարվում են ԵԱՀԿ Մինսկի խմբի կողմից: Սա որեւէ առնչություն չունի ԵԽԽՎ-ի, հատկապես` մոնիտորինգ իրականացնող համազեկուցողների հետ:
- Ձեր հեղինակած` «Բանակի ներգրավումը 2008թ. մարտի հայաստանյան իրադարձություններին» նախագիծն ի՞նչ փուլում է:
- Նախագիծը չի հանգեցրել առանձին զեկույցի պատրաստման, փոխարենը` բյուրոն որոշեց, որ այն պետք է լինի մոնիտորինգի ընթացակարգի մի մաս:
- ԵԽԽՎ 3 բանաձեւերում արծարծվում է քաղաքական հայացքների համար անազատության մեջ գտնվող անձանց հարցը: Մտադի՞ր եք արդյոք հետամուտ լինել այս հարցին եւ արդյո՞ք համարում եք, որ Հայաստանում կան քաղբանտարկյալներ:
- Որպես զեկուցող, մենք մշտական պարտավորություն ունենք` հետամուտ լինելու բանաձեւերի եւ հանձնարարականների կատարմանը: Անձամբ ես, մինչեւ հակառակն ինձ չապացուցվի, համարում եմ, որ այդ մարդիկ քաղաքական բանտարկյալներ են:
- Որոշ աղբյուրներ Հայաստանում պնդում են, որ դուք հայտնի եք նախկինում արված ձեր հակահայկական քայլերով: Ինչպե՞ս կմեկնաբանեք նման պնդումները:
- Ես երբեւէ հակահայկական քայլեր չեմ ձեռնարկել. ես մշտապես պայքարել եմ հանուն ժողովրդավարության, մարդու իրավունքների եւ օրենքի իշխանության` անկախ երկրից: Այսուամենայնիվ, այսօր թվում է, որ Հայաստանը դեռ երկար ճանապարհ ունի անցնելու` այդ նպատակներին հասնելու համար: Ես չեմ կարծում, թե խելացի քայլ էր «Հանուն ժողովրդավարության ապագայի» ֆորումը Երեւանում անցկացնելու որոշում կայացնելը (տեղի է ունենալու 2010թ. հոկտեմբերի 19-20-ը - խմբ.)` առանց նախապես ապացույցներ ունենալու, որ Հայաստանը կատարում է ԵԽԽՎ բանաձեւերի պահանջները:
- Կարո՞ղ եք մոտավոր ժամկետներ նշել, թե երբ կայցելեք Հայաստան:
- Չեմ կարող ամսաթիվ ասել, բայց` հնարավորինս շուտ:
Կարծիքներ
Հայտնեք ձեր կարծիքը