Դադարեցնե՛լ

Երիտասարդ բնապահպան ակտիվիստ Մարիամ Սուխուդյանը իր փաստաբան Նոնա Գալստյանի հետ երեկ ներկայացել է Էրեբունու ոստիկանություն, որտեղ ընթանում է նրա դեմ հարուցված քրեական գործի նախաքննությունը։ Հիշեցնենք, որ ակտիվիստի դեմ գործ է հարուցվել այն բանից հետո, երբ նա նկարահանել եւ հեռուստատեսությանն է տրամադրել Նուբարաշենի թիվ 11 հատուկ դպրոցի սաների պատմություններն այն մասին, որ դպրոցի ուսուցիչներից մեկը սեռական ոտնձգություններ է կատարել սաների նկատմամբ։ Եւ քանի որ ավարտվել էր նախաքննությունը եւ գործի նյութերին ծանոթանալու համար Սուխուդյանի պաշտպանին հատկացված ժամանակը, ուստի երեկ նա ոստիկանությունում միջնորդել է Մարիամ Սուխուդյանի նկատմամբ քրեական հետապնդումը դադարեցնել, եւ դա հիմնավորել է նրանով, որ գործի նյութերով չի հիմնավորվել նրա նկատմամբ «Զրպարտության» հոդվածով մեղադրանքը։ Նոնա Գալստյանը եւս երկու միջնորդություն է ներկայացրել, որոնցից մեկով պահանջել է գործին կցել մեկ այլ ակտիվիստ կամավորի` Արման Ղարիբյանի ու դպրոցի սաներից մեկի խոսակցության ձայնագրությունն այն մասին, որ ոստիկանությունում նշված սանը ստելու է, եթե ասի, որ Մարիամն իրեն ստիպել է սուտ պատմություններ պատմել ուսուցչի կողմից ոտնձգության մասին։ Երկրորդ միջնորդությամբ` Գալստյանը պահանջել է գործին կցել մեկ այլ սանի պատմությունը նույն ուսուցչի կողմից սեռական ոտնձգության ենթարկվելու մասին։ Միջնորդությունները բավարարելու կամ չբավարարելու մասին փաստաբանը պետք է տեղեկացվի մեկ օրվա ընթացքում։