Արտակարգ իրավիճակներ

Նախօրեին Ազատ գետի վարարման հետեւանքով ողողվել էին Արարատի մարզի Բուրաստան գյուղի մշակովի ցանքատարածքներ: Գյուղացիների փոխանցմամբ, Բուրաստան գյուղում ողողվել է մոտ 2 հա մշակովի ցանքատարածք, ինչպես նաեւ գետի ափին մոտ գտնվող ավտոտեխսպասարկման կետի շինության հիմքը: Լանջազատ գյուղում փլուզվել է համայնքային նշանակություն ունեցող կամուրջը, ջրածածկվել է 3000 քմ մակերեսով հողատարածք: Գյուղապետ Ֆրունզ Առաքելյանի խոսքով, բարեբախտաբար ջուրը չի հասել ցանքատարածքներին, սակայն ցանքատարածքների ներքեւի հատվածից ջուրը հողակտորներ է տարել, ինչից փլուզում է տեղի ունեցել»: Գյուղապետը մեզ հայտնեց նաեւ, որ լուրջ խնդիր է առաջացել նաեւ գյուղին մոտ գտնվող զինվորական ուղեկալի հետ կապված, եւ վարարման հետեւանքով կամուրջն է փլուզվել:

Տեղի ունեցածի մասին պաշտոնական տեղեկատվություն հայտնվեց միայն 17.30-ի սահմաններում. համատեղ հաղորդագրությամբ հանդես եկան ՀՀ Արտակարգ իրավիճակների, բնապահպանության եւ առողջապահության նախարարությունները, ըստ որի, մշուշի պատճառը ոչ թե որեւէ վթար էր, այլ Մերձավոր Արեւելքի անապատային լանդշաֆտում գրանցված հզոր ցիկլոնը, որի հետեւանքով մեծ քանակությամբ անապատային փոշին տարածվել է միջին եւ բարձր մթնոլորտ: «Քանի որ հանրապետության տարածքում ապրիլի 19-ի ցերեկային ժամերից առ այսօր եղանակը պայմանավորված է Մերձավոր Արեւելքից ներթափանցող հարավային արեւադարձային տաք օդային հոսանքներով, այդ իսկ պատճառով փոշու մեծ կոնցենտրացիա պարունակող օդը հարավից տարածվում է Հայաստան, Վրաստան եւ ՌԴ-ի հարակից շրջաններ»,- նշված էր պաշտոնական հաղորդագրության մեջ:

Ապրիլի 13-ին Տավուշի մարզում տեղի է ունեցել սողանք, որի հետեւանքով վնասվել են Իջեւան-Ներքին Ծաղկավան ավտոճանապարհը (դարձել է միակողմանի երթեւեկելի) եւ գյուղը սնուցող խմելու ջրի ջրագիծը: Սողանքի հետեւանքով փլուզվել է Իջեւան-Նոյեմբերյան ավտոճանապարհից դեպի Ներքին Ծաղկավան գյուղ տանող ավտոճանապարհի 1-ին կիլոմետրի 30 մ երկարությամբ, 15 մ լայնությամբ եւ 20 մ խորությամբ հատվածը, որը թափվել է գյուղը սնուցող 120 մմ տրամագծով խմելու ջրի խողովակաշարի վրա և վնասել 30 մ երկարությամբ հատվածը, վտանգ է սպառնում նաեւ ներքեւում գտնվող գազատար խողովակին: Գյուղի ջրամատակարարումը վերականգնվել է: Այս մասին հայտնում են ՀՀ ԱԻ նախարարության փրկարար ծառայությունից:

Նախօրեին Երեւան-Իջեւան ավտոճանապարհի 105-րդ կիլոմետրին` Տավուշի մարզի Թեղուտ գյուղի հարակից տարածքում, Աղստեւ գետի վարարման հետեւանքով վնասվել էր մոտ 25 մետր երկարությամբ ափապաշտպան հենապատը: Ըստ ԱԻՆ հաղորդագրության` քանդվել էր հենապատի հարակից միջպետական ավտոճանապարհի հատվածը, ինչի հետեւանքով երթեւեկությունը դարձել էր միակողմանի: Երթեւեկության անվտանգությունն ապահովելու նպատակով վնասված հատվածն արգելափակվել էր ժապավեներով:

Շիրակի մարզի Առափի գյուղի գերեզմանատան մոտ նախօրեին ակտիվացել էին սողանքային երեւույթները, ինչի հետեւանքով հողաշերտի զանգվածը սահել է ներքեւ` վնասելով հարակից տան պատը: ՀՀ ԱԻՆ փրկարար ծառայությունից հայտնում են, որ տեղում պարզվել է, որ սահած հողաշերտի զանգվածը (մոտ 80 խմ.) վնասել է 1-ին փողոցի 1-ին նրբանցքի` Ռ.Պողոսյանին պատկանող թիվ 3 տան արեւմտյան պատը 10 մետր երկարությամբ, ինչից առաջացել է փլուզման վտանգ, իսկ հողաշերտի երկրորդ զանգվածը կանգ է առել հարակից թիվ 5 եւ թիվ 43 սեփական տների մոտակայքում` մոտ 1 մ հեռավորության վրա: Ռ.Պողոսյանին պատկանող սեփական տանը բնակվում է 6 անձ, որից երկուսը` անչափահաս, իսկ թիվ 5 եւ թիվ 43 տներում` համապատասխանաբար 6 (որից 3-ը` անչափահաս) եւ 7 (որից 3-ը` անչափահաս) անձ: Բնակիչները տարհանվել են: Շիրակի մարզպետի կարգադրությամբ, տարահանվող բնակիչների համար գյուղի դպրոցում հատկացվել են սենյակներ:

Երեկ հրդեհ էր բռնկվել Երեւանի Քաջազնունու 20ա հասցեում գտնվող «ՍԱՍ» սուպերմարկետում: Հրդեհի հետեւանքով հինգ հոգի տեղափոխվել էին հիվանդանոց: ՀՀ ԱԻՆ փրկարար ծառայությունից հայտնում են, որ հրդեհը բռնկվել էր սուպերմարկետի վերելակի հորանում: Դեպքի վայր մեկնած հրշեջ փրկարարներին մոտ երեք ժամում է հաջողվել մեկուսացնել հրդեհը եւ մարել այն: Դեպքի վայրում ճակատի հատվածում վնասվածք է ստացել թիվ 8 հրշեջ-փրկարարական ջոկատի պետ Մ. Ավետիսյանը: Տուժածը տեղափոխվել է «Էրեբունի» բժշկական կենտրոն, որտեղ, ստանալով համապատասխան բուժօգնություն, դուրս է գրվել: Հրդեհի հետեւանքով հիվանդանոց տեղափոխված սուպերմարկետի 4 աշխատակիցները եւս դուրս են գրվել: Երեկ «Արմենիա» բժշկական կենտրոնից մեզ հայտնեցին, որ հրդեհի վայրից բուժկենտրոն տեղափոխված չորս անձանց ամբուլատոր բուժօգնություն է ցուցաբերվել, եւ նրանց կյանքին որեւէ վտանգ չի սպառնում:
Երեկ ողջ օրվա ընթացքում սուպերմարկետի աշխատակիցները տարածքից դուրս էին հանում խանութում գտնվող ապրանքները եւ տեղափոխում պահեստ: Աշխատակիցները մեզ հայտնեցին, որ իրենց դեռեւս հայտնի չէ, թե որն է եղել հրդեհի պատճառը, հայտնեցին նաեւ, որ այժմ խանութը պետք է վերանորոգվի եւ մոտավորապես 10 օրից այն կվերաբացվի:

«Զվարթնոց» օդանավակայանի տարածքում երեկ առավոտյան հրդեհ էր բռնկվել, իսկ ըստ ականատեսների` հրդեհից առաջ պայթյուն է հնչել: Արտակարգ իրավիճակների նախարարության լրատվության վարչությունից երեկ հաստատեցին հրդեհի բռնկման փաստը: Հրշեջների ջոկատ, սակայն, օդանավակայան չի ուղարկվել, քանի որ հրդեհը եղել է շատ աննշան եւ այն մարվել է օդանավակայանի աշխատակիցների կողմից: «Զվարթնոցից» հայտնում են, որ հրդեհ էր բռնկվել օդանավակայանի վերանորոգվող սրահներից մեկը: Հրդեհվել են վերանորոգման նյութեր:

Օգոստոսի 19-ին Երեւանի Հրազդանի կիրճում գտնվող «Գեղամա» ռեստորանում թունավորման դեպք գրանցվեց` հոսպիտալացվեց 41 հոգի, իսկ օգոստոսի 26-ին Երեւանի Ազատության պողոտայում կրակոցներ հնչեցին` հրազենային վիրավորում ստացած երիտասարդը տեղափոխվեց հիվանդանոց: Երկու դեպքերի հետ կապված էլ քրեական գործեր են հարուցվել, որոնց նախաքննությունը դեռեւս շարունակվում է:

«Ցայգ» հեռուստաընկերությունը երեկ տեղեկություն էր հրապարակել, որ Գյումրու «Մուշ 2» նորակառույց թաղամասում նախօրեին` գիշերը ժամը 1.30-ի սահմաններում ամբողջապես ներքեւ է իջել թիվ 16 շենքի 13-րդ բնակարանի առաստաղի գաջապատ հատվածը: Բարեբախտաբար որեւէ բնակիչ չի տուժել, սակայն վնասվել է նշված բնակարանի գույքը: «Ցայգ»-ի փոխանցմամբ` օգոստոսի 18-ի վաղ առավոտյան «Մուշ 2» թաղամասում իրարանցում էր. բնակիչները, մեկը մյուսից հարեւանի տանը տեղի ունեցածի մասին իմանալով` եկել էին իրենց աչքերով տեսնելու եղածը: Դեպքի հետ կապված երեկ «Գլենդել Հիլզ» ՓԲԸ մամուլի ծառայությունը հանդես եկավ հայտարարությամբ, ըստ որի` ընկերության մասնագետները տվել են վերոնշյալ շենքում տեղի ունեցածի նախնական գնահատականը: Ըստ այդմ, շինարարության ընթացքում երկաթբետոնե աղյուսի (панель) մեջ ջուր է հավաքվել, որը որոշակի դեպքերում չի կարող նկատվել կամ բացահայտվել ստուգումների ընթացքում: Ժամանակի ընթացքում ջուրը ներծծվելով գաջապատ հատվածի մեջ եւ խոնավացնելով այն, թուլացրել եւ վնասել է: «Շինարարական որեւէ չափանիշով տեղի ունեցածը փլուզում չի համարվում: Ի դեպ, հենց այդպիսի դեպքերի համար է մեր ընկերությունը հայտարարել երաշխիքային սպասարկման ժամանակահատված: Ամեն դեպքում, ցավում ենք տեղի ունեցածի համար եւ տեղեկացնում, որ վնասվածքի հետեւանքներն ամբողջությամբ կվերացվեն: Միաժամանակ տեղեկացնում ենք, որ դեպքը եզակի է, եւ մյուս բնակարանների բնակիչներն անհանգստանալու պատճառ չունեն»,- նշված է ընկերության տարածած հաղորդագրության մեջ:

Օգոստոսի 9-ին ոստիկանության Գորիսի բաժնում նյութեր են ստացվել, որ ս/թ օգոստոսի 5-ին, ժամը 16.45-ի սահմաններում հրդեհ է բռնկվել «Հայանտառ» ՊՈԱԿ Սյունիքի անտառտնտեսության Գորիսի անտառպետության 6-րդ պահաբաժնում: Ոստիկանությունից հայտնում են, որ հրդեհից այրվել է 3 հա անտառային տարածք: Պատճառված նյութական վնասի չափը եւ հրդեհի առաջացման պատճառը պարզվում են:

Սերժ Սարգսյանը ցավակցական հեռագիր է ուղարկել ՌԴ նախագահ Դմիտրի Մեդվեդեւին` Ռուսաստանի կենտրոնական մարզերում տեղի ունեցած տարերային աղետի` լայնածավալ հրդեհների առնչությամբ: Հրդեհների արդյունքում տասնյակ մարդիկ են զոհվել, իսկ հազարավորները մնացել անտուն` կորցնելով նաեւ իրենց գույքը:

Երեկ կեսօրին հնչեց այս տարվա ընթացքում արդեն երրորդ կեղծ ահազանգն այն մասին, որ ՀՀ կառավարությանն առընթեր Պետական եկամուտների կոմիտեի շենքում ռումբ է տեղադրված: Դեպքի առնչությամբ ոստիկանությունը հաղորդագրություն տարածեց, ըստ որի` ժամը 11.34-ին 1-02 հեռախոսահամարին անհայտ քաղաքացուց ահազանգ է ստացվել, որ ՊԵԿ նախագահ Գագիկ Խաչատրյանի աշխատասենյակում պայթուցիկ սարք է տեղադրված: «Անմիջապես դեպքի վայր մեկնած ոստիկանության տարբեր ստորաբաժանումների, ՀՀ ԱԱԾ, արտակարգ իրավիճակների նախարարության եւ հրշեջ ծառայության աշխատակիցներից կազմված օպերատիվ խումբը պարզել է, որ ահազանգը չի համապատասխանում իրականությանը:

Կիրակի օրը` հուլիսի 18-ին, Երեւան-Մոսկվա ուղղությամբ չվերթ իրականացնող ինքնաթիռն օդ բարձրանալուց 10 րոպե անց տեխնիկական խնդիրներ է ունեցել, հետ է շրջվել եւ հարկադրված վայրէջք իրականացրել «Զվարթնոց» օդանավակայանում: Ուղեւորները պատմում են, որ երբ օդանավը բարձրանալիս է եղել, ուժեղ վիբրացիա է զգացվել, եւ ամբողջ ինքնաթիռը մի պահ թափահարվել է, ինչի հետեւանքով օդանավի մեջ մեծ խուճապ է առաջացել: Բարեբախտաբար, օդաչուները կարողացել են բարեհաջող վայրէջք կատարել, եւ ինքնաթիռում գտնվող 134 ուղեւորներից եւ ոչ մեկը չի տուժել: Հայաստանի քաղավիացիայի վարչության լրատվական ծառայության ղեկավար Նելլի Չարչինյանը հայտնեց, որ դեպքը տեղի է ունեցել «Աէրոֆլոտ» ընկերությանը պատկանող «Ա 320» ինքնաթիռի հետ: Իրականացված քննության ընթացքում պարզվել է, որ ինքնաթիռի շարժիչի աշխատանքը խափանվել է, քանի որ դրա մեջ թռչուն է ընկել: Ըստ «Աէրոֆլոտի» տնօրեն Վադիմ Կովալենկոյի, «Զվարթնոց» օդանավակայանում թռչունների առկայությունն առաջին անգամ չէ, որ խնդիրներ է առաջացնում օդաչուների համար, եւ այժմ ընկերությունը պատրաստվում է դիմել «Զվարթնոցի» ղեկավարությանը եւ կոչ անել շտկել օդանավակայանում առկա խնդիրները:

Հուլիսի 14-ին հրդեհ է բռնկվել Վայոց ձորի մարզի Ջերմուկ քաղաքի Շահումյան 28 հասցեում գտնվող «Ջերմուկ» հյուրանոցում: Դեպքի վայր է մեկնել երեք մարտական հաշվարկ եւ մարզային փրկարար ջոկատը: Քիչ անց օգնության է մեկնել եւս մեկ մարտական հաշվարկ: Հրդեհը մեկուսացվել է ժամը 12.16-ին, մարվել` 12.30-ին: Ընդհանուր առմամբ այրվել է 350 քմ տարածք: Հրշեջ-փրկարարների օգնությամբ ծխապատ գոտուց դուրս են բերվել երկու քաղաքացի` Երեւանի բնակիչներ Հ. Եղիազարյանը եւ Ռ. Վարդանյանը: Զոհեր ու վիրավորներ չկան:

Երեկ առավոտյան, ժամը 9.00-9.30 ի սահմաններում, պայթյուն է տեղի ունեցել Մալաթիա-Սեբաստիա համայնքի Կուրղինյան փողոցի 27 շենքի երկրորդ հարկում: Ըստ նախնական տվյալների, զոհվել է այրված տան տերը: Դեպքի վայր են ժամանել համայնքի հրշեջ ծառայության, ոստիկանության, շտապօգնության, Արտակարգ իրավիճակների նախարարության ներկայացուցիչները: Պայթյունից անմիջապես հետո դադարեցվել է Կուրղինյան փողոցի 27 շենքի գազամատակարարումը: Ենթադրվում է, որ պայթյունի պատճառը եղել է գազի արտահոսքը: Ըստ ականատեսների, այն բնակարանը, որտեղ տեղի է ունեցել պայթյունը, գրեթե ամբողջովին այրվել է, քանդվել են շենքի դիմացի եւ հետեւի պատերը, վնասվել են շենքի մոտ կայանած ավտոմեքենաները, կոտրվել են դիմացի շենքի ապակիները: